生於七月一日

仲有唔夠一個月gea時間，香港就回歸中國統治整整一個decade。十年前我係一個不諳世事gea死靚仔，過左十年，低B依然。唯一唔同gea地方係我經已再無年紀小所自然而黎gea庇蔭，所有野都要學識自食其力。我仲好記得我第一次認識中國，係我仲係讀緊小學果陣，每逢雙十節都掛左晒係我住gea屋村裡面果Ｄ“青天白日滿地紅旗”同埋孫中山像。我呢一代，甚至上幾代，都唔會唔記得，因為主權移交，香港再無因為重光紀念同埋孫中山先生壽辰而放假。然後，當我再然認識中國呢個陌生gea國家，就係九七，同埋一次老師係週會上面講述六四事件。對於九七，其實印象並不如六四一樣咁深刻，但係可能係自己八卦gea原故，自從果一個週會之後我不斷咁自己去搵一Ｄ關於六四當年發生gea事gea資料。九七對於當時仲係讀緊中二gea我黎講非常簡單，就係：租約期滿，業主收樓。我當然唔可能體會到為口奔馳gea香港人對於紅色死恐怖快將襲港gea恐懼。但係對於六四，雖然我所搜集到的全部不過係一Ｄ二手資料，但係一幕幕慘不忍睹gea境象，對於一個年輕人而言，就成為左不可磨滅gea印記。

在此以後，如果可以gea話，我每年gea六四都會去維園。唔係為左支持果班都唔知做緊乜gea支聯會，但係為左記念果班為左中國gea未來吶喊gea年輕心靈。（當然我地都好鐘意話其中生存落黎gea人好多都變成沽名釣譽。但係，我始終相信，他們當日年輕gea時候做gea事，絕大多數都係因為一種近乎幼稚的愛國感同埋責任感。）而對我自己黎講，我真正gea政治啟蒙課係由廿三條引起七一大遊行開始。我係遊行gea隊伍裡面親眼見到香港人gea成熟同節制，亦見到一班庸才浪費大好機會。不過，好在呢班庸才無把握機會，因為我都唔想香港因為行民主而令“香港之死”一語成讖。由六四到七一，由傷痛gea過去到殘酷gea現在到本來觸手可及gea未來。香港慢慢適應新gea規律，自己亦不斷學習成人世界生存gea法則。

對比自己對“義勇軍進行曲”gea抗拒，我見到年紀比我小gea小朋友對呢首歌啷啷上口。我唔怕香港未來唔可以同大陸進行經濟融合，我怕德先生繼續坐冷板凳，我怕孫先生理想中gea大同世界最後會成為封塵gea歷史卷宗。最近朋友提起錢穆先生gea“艱險我奮進、困乏我多情”，我gea反應係一貫gea冷嘲熱諷。原來，最可怕gea，竟然係自己。